100 оюутныг УИХ-д цалинтай дадлагад хамрууллаа

2026 оны 3 дугаар сарын 11-нд “Нээлттэй парламент” цогц үйл ажиллагааны оюутан дадлагажуулах хөтөлбөрийн нээлтэд оролцлоо. Хөтөлбөрийн удирдамж, хэрэгжүүлэх ажлын төлөвлөгөө болон хамрагдах хүсэлтээ ирүүлсэн 1,037 оюутны сонгон шалгаруулалтын дүнг танилцууллаа.

Хөтөлбөрт шалгарсан 100 оюутан Улсын Их Хурлын гишүүдийг дагалдан цалинтай дадлага хийж, байнгын хороо, ажлын хэсгийн үйл ажиллагаатай танилцах боломжтой. Мөн “Загвар парламент” үйл ажиллагаанд оролцож, хуулийн төсөл боловсруулах, хэлэлцэх, батлах үйл явцыг бодитоор мэдрэх юм.

Нээлтийн үеэр дадлага нь оюутнуудад мэргэжлийн мэдлэгээ дээшлүүлэх, туршлага хуримтлуулахын зэрэгцээ иргэний үүрэг, хариуцлагаа ухамсарлаж, төрийн үйл хэрэгт идэвхтэй оролцох боломж олгохыг онцоллоо.