Төсвийн мэдээллийг нээлттэй болгох хуулийн төслөө өргөн мэдүүллээ
“Төсвийн тухай хуульд нэмэлт, өөрчлөлт оруулах тухай” хуулийн төслийг санаачлан боловсруулж, 2026 оны 9 дүгээр сарын 29-нд бусад гишүүнтэй хамтран Улсын Их Хуралд өргөн мэдүүллээ. Төсөлд зардлын дэлгэрэнгүй мэдээллийг цахимаар татаж авч, харьцуулан шалгах боломж бүрдүүлэхээр тусгалаа.
Төсвийн зарцуулалтыг иргэд хянахын тулд зардлын дэлгэрэнгүй мэдээллийг авч, харьцуулан шалгах боломжтой байх шаардлагатай. Иймээс төсвийн мэдээллийг иргэд, олон нийт, судлаачид цахим орчинд дэлгэрэнгүй задаргаатайгаар, файлаар татаж авах боломжийг бүрдүүлнэ.
Төсөлд урсгал зардлын зориулалт, нэгжийн үнэ, тоо хэмжээ, хүрэх үр дүнг мэдээлж, өмнөх оны гүйцэтгэлтэй харьцуулан нийтлэхээр тусгав. Барилга байгууламжийн өртгөөс гадна ашиглалтад орсны дараах цалин, засвар үйлчилгээ, дулаан, цахилгааны зардлыг тооцож, уг мэдээлэлд багтаахаар тусгалаа.
Мөн хөрөнгө оруулалтын төслүүдийг тогтоосон шалгуураар үнэлж, авсан оноогоор нь эрэмбэлэх, үнэлгээ хийгээгүй төслийг төсөвт оруулахыг хязгаарлах зохицуулалт орууллаа. Төсвийн мэдээллийг олон нийтэд ойлгомжтой танилцуулж, иргэдээс ирүүлсэн саналыг хэрхэн шийдвэрлэснийг үндэслэлийн хамт эргэн мэдээлдэг байхаар тусгав.
Анх нийтэлсэн болон албан ёсны холбоосууд.
FacebookС.Цэнгүүний нийтэлсэн тайлбар↗LawForumТөслийн бүрэн эх, явц, хавсралт↗Parliament.mnӨргөн мэдүүлсэн тухай албан мэдээ↗